ពាណិជ្ជករ​ចិន​កំពុង​ស្វែង​រក​ឱកាស​ វិនិយោគ​នៅ​កម្ពុជា

ភ្នំពេញៈ គណៈ​ប្រតិភូ​ពាណិជ្ជកម្ម​ប្រមាណ​១០០​នាក់​តំណាង​ឲ្យ​ ក្រុមហ៊ុន​យ៉ាង​ហោច​៥២​ ក្រុមហ៊ុន​របស់​ចិន​កំពុង​ស្វែង​រក​ឱកាស​វិនិយោគ​ក្នុង​ប៉ូល​ សេដ្ឋកិច្ច​ សំខាន់ៗ​បី​របស់​កម្ពុជា​។
ការ ​ស្វែង​រក​ឱកាស​នេះ​ធ្វើ​ឡើង​ក្នុង​ជំនួប​រវាង​លោក​នាយក​រដ្ឋ ​មន្ត្រី​ហ៊ុន សែន និង​ក្រុម​ពាណិជ្ជករ​ចិន​កាល​ពី​ថ្ងៃ​ព្រហស្បតិ៍។
លោក អ៊ាង សុផល្លែត​ជំនួយ​ការ​ផ្ទាល់​លោក​នាយក​រដ្ឋ​មន្រ្តី​ហ៊ុន សែន បាន​ប្រាប់​អ្នក​យក​ព័ត៌មាន​ក្រោយ​ជំនួប​កាល​ពីថ្ងៃ​ម្សិល​មិញ​ថា​៖ «​គណៈ​ប្រភូ​នៃ​ក្រុមហ៊ុន​ចំនួន​៥២​មក​ប្រទេស​កម្ពុជា​ដើម្បី ​ស្វែង​រក​ លទ្ធភាព​វិនិយោគ​ក្នុង​ប្រទេស​កម្ពុជា​ជា​ពិសេស​ក្នុង​ទី​ ក្រុង​ភ្នំពេញ​ ក្រុង​ព្រះ​សីហនុ និង​ខេត្ត​សៀមរាប​»។

លោក ​បន្ត​ថា៖ «​នៅ​ថ្ងៃ​នេះ​គណៈ​ប្រតិភូ​ទាំង​នោះ​គឺ​ស្ថិត​ក្នុង​ដំណាក់​កាល​សិក្សា​ ស្រាវ​ជ្រាវ​អំពី​លទ្ធភាព​ក្នុង​ទី​ក្រុង​ភ្នំពេញ​។ ថ្ងៃ​ស្អែក​គណៈ​ប្រតិភូ​ទាំង​នោះ​នឹង​ធ្វើ​ដំណើរ​ឆ្ពោះ​ទៅ​តំបន់​សេដ្ឋកិច្ច ​ពិសេស​ខេត្ត​ព្រះសីហនុ​និង​បន្ត​ដំណើរ​ទៅ​ខេត្ត​សៀមរាប​ ក្នុង​ថ្ងៃ​ដដែល​»។ ​លោក​នាយក​រដ្ឋ​មន្ត្រី ហ៊ុន សែន បាន​ប្រាប់​គណៈ​ប្រតិភូ​ថា​ទំនាក់​ទំនង​រវាង​កម្ពុជា​និង​ចិន​ត្រូវ​បាន​ កសាង​ឡើង​ក្នុង​រយៈ​ពេល​ជា​យូរ​មក​ហើយ ហើយ​ជា​បណ្ដើរៗ​វា​បាន​ក្លាយ​ជា​ដៃ​គូ​យុទ្ធ​សាស្រ្ត​គ្រប់​ប្រភេទ។ នេះ​បើ​តាម​លោក អ៊ាង សុផល្លែត​។
លោក ​បន្ត​ថា​ចិន​បាន​ជួយ​កម្ពុជា​ស្ទើរ​តែ​គ្រប់​វិស័យ​ទាំង​អស់ ​រួម​មាន ​ការ​កសាង​ផ្លូវ​ថ្នល់​មួយ​ដែល​ជា​ផ្លូវ​វែង​ជាង​គេ​ក្នុង​ ប្រទេស​កម្ពុជា​ ប្រព័ន្ធ​ធារា​សាស្រ្ត ការ​វិនិយោគ​ក្នុង​ការ​កសាង​ទំនប់​វារី​អគ្គិសនី​ដើម្បី​បង្កើត​អគ្គិសនី​ និង​ការ​វិនិយោគ​ក្នុង​ការ​កសាង​រោងចក្រ​អគ្គិសនី​ដើរ​ដោយ​ ធ្យូង​ថ្ម ក្នុង​ខេត្ត​ព្រះ​សីហនុ​ហើយ​ចិន​ក៏​បាន​ជួយ​ផ្ដល់​អាហារូករណ៍​ផង​ដែរ​។ លោក​បន្ត​ថា​៖ «​ចិន​បាន​ជួយ​កម្ពុជា​មិន​គ្រាន់​តែ​ក្នុង​ការ​អភិវឌ្ឍ​សង្គម​ប៉ុណ្ណោះ​ទេ​ ថែម​ទាំង​ក្នុង​ការ​ពង្រឹង​ឯករាជ្យ​ភាព​របស់​ខ្លួន​ទៀត​ផង។ ដៃ​គូ​យុទ្ធសាស្រ្ត​គឺ​មិន​គ្រប់​គ្រាន់​ទេ​ប៉ុន្តែ​យើង​ត្រូវ​ការ​ វិនិយោគិន​ដើម្បី​ចូល​រួម​»​។
កាល​ពី​មុន​អ្នក​ដឹក​នាំ​ប្រទេស​ទាំង​ ពីរ​លោក​នាយក​រដ្ឋ​មន្រ្តី ហ៊ុន សែន​និង​ប្រធានា​ធិបតី ហូ ជីន​តាវ​សន្យា​ពង្រឹង​ពាណិជ្ជកម្ម​ទ្វេ​ភាគី ឲ្យ​ដល់​៥​ពាន់​លាន​ដុល្លារ​។
លោក​នាយក​រដ្ឋ​មន្រ្តី ហ៊ុន សែន ឲ្យ​ដឹង​ថា​ជើង​ហោះ​ហើរ​ត្រង់​ពី​ចិន​មក​កម្ពុជា​ត្រូវ​បាន​កែ​លម្អ​ប៉ុន្តែ វា​ពិត​ជា​មិន​ទាន់​បាន​ឆ្លើយ​តប​ទៅ​នឹង​កំណើន​អ្នក​ទេសចរ​ជន ​ជាតិ​ចិន​នៅ​ ឡើយ​ទេ​ដូច្នេះ​ទេសចរណ៍​គឺជា​វិស័យ​មួយ​ដែល​មាន​សក្ដានុពល​ពី ​ព្រោះ​ប្រជាជន ​ចិន​មាន​ចំនួន ១ ៣០០ លាន​នាក់​។
កាល​ពី​ខែ​មករា​លោក ថោង ខុន រដ្ឋ​មន្រ្តី​ក្រសួង​ទេសចរណ៍​ឲ្យ​ដឹង​ថា​ទេសចរ​ជនជាតិ​ចិន​មក​ទស្សនា​ កម្ពុជា​នឹង​កើន​ឡើង​ដល់​២​លាន​នាក់​ត្រឹម​ឆ្នាំ​២០២០។
ទិន្នន័យ ​ពី​ក្រុម​ប្រឹក្សា​អភិវឌ្ឍន៍​កម្ពុជា​បាន​បង្ហាញ​ថា​ រដ្ឋាភិបាល ​បាន​អុម័ត​គម្រោង​វិនិយោគ​៩,០៥​ពាន់​លាន​ដុល្លារ​ពី​ប្រទេស ចិន ចាប់​ពី​ឆ្នាំ​១៩៩៤​រហូត​ចុង​ខែ​កក្កដា ឆ្នាំ​២០១២។​ការ​វិនិយោគ​ភាគ​ច្រើន​ក្នុង​ឧស្សាហកម្ម​កាត់​ដេរ​រ៉ែ​វិស័យ​ កសិកម្ម និង រោង​ម៉ាស៊ីន​កិន​ស្រូវ៕
Posted in ព័ត៌មាន.